बर्खा स्मृति अन्तरपालिका क्रीकेट : गौरादह र कचनकवल क्वाटर फाइनलमा

बुद्धशान्ति , माघ १४ ।

बर्खा स्मृति प्रतिष्ठान बुद्धशान्तिले आयोजना गरेको दोस्रो संस्करणको झापा जिल्ला अन्तरपालिका टि 20 क्रीकेट प्रतियोगितामा गौरादह र कचनकवल गाउँपालिका क्वाटर फाइनलमा प्रबेश गरेका छन् ।

आज भएको पहिलो खेलमा गौरादहले बुद्धशान्ति गाउँपालिकालाई २४ रनले पराजित गर्दै क्वाटर फाईनलमा स्थान सुरक्षित गरेको छ । टस हारेर ब्याटिङको निम्तो पाएको गौरादहले बुद्धशान्तिलाई  २०३ रनको विशाल लक्ष्य प्रस्तुत गरेको थियो । लक्ष्य पछ्याउने क्रममा बुद्धशान्तिले ८ विकेटको क्ष्यतिमा १७८ रन बनायो ।

गौरादहलाई जितका लागि सुरज न्यौपाने ५४,अर्जुन यादब ५० रन बनाएका थिए भने बुद्धशान्तिका लागि  आदि हाङ फागोले ४०, कप्तान अर्पण कार्किले ३४ र पारस निरौलाले ३२ रन बनाए पनि अन्य ब्याट्समेनले उल्लेख्य रन बनाउन सकेनन् । खेलमा गौरादहका सुरज न्यौपाने म्यान अफ द म्याच घोषित हुँदै नगद ३ हजार र ट्रफी प्राप्त गरे ।

त्यसैगरी दोस्रो खेलमा टस जितेर ब्याटिङमा उत्रेको गौरिगन्ज गाउँपालिका ४३ रनमा अल आउट हुन पुग्यो । पहिलो संस्करणको उपबिजेता रहेको कचनकवलका बलर सामु निरीह बनेको गौरीगन्जले १०.५ ओभर मात्रै टिक्न सफल भयो । उस्का लागि कुनै पनि ब्याटसमेनले दोहोरो अङ्क पनि बनाउन सकेनन् ।  ४४ रनको लक्ष्य पछ्याएको कचन कवलले ४.२ ओभरमा १विकेट गुमाएर ९ विकेटको जित हासिल गरेको हो ।

 कचनका तर्फबाट २ ओभर बलिङ गर्दै ८ रन खर्चिएर ४ विकेट लिन सफल दिपेश बोगटी म्यान अफ द म्याच घोषित हुँदै नगद ३ हजार रुपैयाँ र ट्रफी पाए ।

त्यसैगरी भोलिदेखि क्वाटर फाईनलका खेल शुरु हुँदै छन् ।  पहिलो क्वाटर फाईनलमा झापा गाउँपालिका र बिर्तामोड भिडने छन् भने दोश्रो खेल कन्काई र भद्रपुर नगरपालिका बिच रहने सदस्य तथा बुद्धशान्तिका कोच गोकुल पौडेलले जानकारी दिए ।

प्रतियोगिताको विजेताले नगद १ लाख ५० हजार, मेडल, ट्रफी, प्रमाणपत्र पाउनेछ भने उपविजेताले नगद ७५ हजार, मेडल, ट्रफी, प्रमाणपत्र पाउने अध्यक्ष मदन प्रसाईंले बताए ।