अंग्रेजी प्रश्नपत्र आउट, निजी विद्यालयको सेटिङमा प्रहरी प्रशासनको संलग्नता।
सिरहा।
आजको माध्यमिक शिक्षा परीक्षा (एसईई)को पहिलो दिनको अंग्रेजी विषयको प्रश्नपत्र सिरहाको लहान नगरपालिका, १९ सोनमती गाढा, जनता बनवाली माध्यमिक विद्यालय वर्छवा, कल्याणपुर परीक्षा केन्द्रबाट बाहिरिएको पुष्टि भएको छ। परीक्षा शुरु भएको २० मिनेटमा प्रश्नपत्र बाहिर जानु गम्भीर समस्या बनेको छ।
स्थानीय स्रोतका अनुसार, प्रश्नपत्रको आउटिङ्गमा केन्द्राध्यक्ष र प्रहरी प्रशासनको संलग्नता रहेको छ। जहाँ मोबाइलको प्रयोग गरेर प्रश्नपत्र बाहिरिएको भनिएको छ। यसको प्रमाणस्वरूप केही व्यक्तिहरुले मोबाइलको माध्यमबाट प्रश्नपत्र बाहिर पठाएको आरोप लागेको छ।
यस घटनाबारे जिल्ला परीक्षा समन्वय समितिका संयोजक तथा प्रमुख जिल्ला अधिकारी बासुदेव दाहालले एसईईको मर्यादित सञ्चालनका लागि ५० जना डेडिकेटेड व्यक्तिहरूको टोली खटाएका थिए। उनले भने, “पात समेत हल्लिन दिएको छैन, प्रश्नपत्र कसरी बाहिरिएको छ भन्ने बारे अनुसन्धान भइरहेको छ, र त्यसको स्रोत पत्ता लागेमा कडा कारबाही हुनेछ।”
यस वर्ष परीक्षा केन्द्रमा मोबाइल तथा अन्य चिटिङ सामग्रीको प्रयोगमा कडाइ गरिएको भएता पनि, प्रश्नपत्र आउट हुँदा प्रहरी प्रशासन र परीक्षा केन्द्रका अधिकारीहरूको संलग्नता भएको आरोप स्थानियले लगाएका छन्। जिल्लामा ५० वटा परीक्षा केन्द्रमा १० हजार सात सय तीन जना विद्यार्थी सहभागी छन्।
