बर्दिया,
नेपाल बीमा प्राधिकरणका अध्यक्ष शरद ओझा र भुटानको रोयल मनिटरी अथोरिटीका डेपुटी गभर्नर उगेन छोदेनबीच बीमा क्षेत्रको विकास र आपसी सहयोग सुदृढ गर्ने उद्देश्यले छलफल भएको छ। भेटमा, अध्यक्ष ओझाले नेपाल र भुटानको बीमा क्षेत्रमा विद्यमान अवस्था, नेपालले लागू गरेको जोखिममा आधारित पूँजी र जोखिममा आधारित सुपरीवेक्षणका विषयमा जानकारी दिए। उनले पुनर्बीमा सम्बन्धी नेपालका अनुभवहरू र द्विपक्षीय सम्बन्ध सुदृढीकरणका लागि नेपाल तयार रहेको बताए।
उगेन छोदेनले नेपाल बीमा प्राधिकरणले हासिल गरेका ज्ञान र अनुभव भुटानको बीमा क्षेत्रमा पनि लाभकारी हुने विश्वास व्यक्त गरे। साथै, उनले बीमा क्षेत्रको समग्र विकासका लागि नेपालसँगको सम्बन्ध अझ सुदृढ गर्न प्रतिवद्धता जनाए। यस छलफलको परिणामस्वरूप, दुवै पक्षले भविष्यमा आपसी सहयोग र बीमा क्षेत्रमा नयाँ अभ्यासहरू साझा गर्ने प्रतिबद्धता जनाएका छन्।
