बाँके।
बाँकेको डुडुवा गाउँपालिका वडा नम्बर २ बेतहनी चोकमा पानी बोक्ने ट्यांकरको ठक्करबाट दुई बालकको घटनास्थलमै मृत्यु भएको छ। मृतक बालकहरू डुडुवा गाउँपालिका २, बेतहनीका विशाल गोडिया र शिवकुमार गोडिया रहेका छन्।
यी दुई बालकहरू स्थानीय नौरीगौडी एकेडेमीको एल.के.जी. कक्षामा अध्ययनरत थिए र विद्यालयबाट फर्किँदै गर्दा ट्यांकरले उनीहरूलाई ठक्कर दिएको हो। प्रत्यक्षदर्शीका अनुसार, बालकहरू सडकमा लडेर चिच्याउँदै गर्दा ट्यांकरले उनीहरूलाई पछाडि किचेको थियो।
घटनाको जानकारी दिँदै बाँकेका प्रहरी प्रमुख एसपी तुलबहादुर कार्कीले भने, “ट्यांकरको ठक्करपछि बालकहरू घटनास्थलमै ज्यान गुमाएका हुन् ।”
मृतक बालकहरू सहोदर दाजु-भाई रहेको प्रहरीले पुष्टि गरेको छ। घटनापछि स्थानीय बासिन्दाले विरोधस्वरूप ट्यांकरमा आगजनी गरेका छन् र प्रहरी चौकीमा ढुंगामुढा सहित आगजनी समेत गरेका छन्। यस घटनाले स्थानीय क्षेत्र तनावपूर्ण बनाएको छ। झडपपछि प्रहरीले अश्रुग्याँस र केहि राउण्ड हवाई फायरिङ पनि गरेको छ । यो घटना समुदायमा ठूलो आक्रोशको कारण बनेको छ, र प्रहरीले थप अन्वेषण जारी राखेको छ।
