काठमाडौँ,
आज काठमाडौँमा चार दलीय समाजवादी मोर्चा र राजावादीले छुट्टाछुट्टै प्रदर्शन गर्दैछन्। समाजवादी मोर्चाले सरकारका गलत क्रियाकलाप र गणतन्त्रको पक्षमा प्रदर्शन गर्ने भने राजावादीहरुले वर्तमान व्यवस्थाका विरुद्धमा आवाज उठाउँदै छन्।
सुरक्षा व्यवस्थालाई कडा बनाउँदै काठमाडौँका विभिन्न स्थानमा सुरक्षाकर्मी र ट्राफिक प्रहरी परिचालन गरिएको छ। प्रदर्शनको कारण, काठमाडौँका विभिन्न स्थानमा सवारी आवागमनमा समस्या देखा परेको छ, र कतिपय रुटहरु बन्द गरिएका छन्। समाजवादी मोर्चाले भृकुटीमण्डपमा भेला हुने र राजावादीले तीनकुनेमा सभा आयोजना गर्ने तयारी गरेका छन्।
समाजवादी मोर्चाले सात वटा रुटबाट जुलुस निकाल्दै भृकुटीमण्डप पुग्ने कार्यक्रम तय गरेको छ, जसमा प्रमुख रुटहरु माइतीघर, कुपन्डोल, र सोह्रखुट्टे क्षेत्रबाट शुरू हुनेछन्।
राजावादी समूहले भने भक्तपुर, जोरपाटी, बौद्ध, र कलंकीतर्फबाट जुलुस निकालेर तीनकुनेमा सम्पन्न गर्ने तयारी गरेका छन्। स्थानीय प्रशासनले दुई समूहबीच भेट हुन नदिन विशेष सुरक्षा व्यवस्था गरेको छ।
