बाँके।
लखनउ सुपर जायन्ट्सले इण्डियन प्रिमियर लिग (आइपिएल) २०२५ मा आफ्नो पहिलो जित हात पारेको छ। लखनउले सनराइजर्स हैदराबादलाई ६ विकेटले पराजित गरेको हो। १ सय ९१ रनको लक्ष्य लखनउले १६.१ ओभरमा ४ विकेट गुमाएर पूरा गर्यो।
लखनउको जितमा निकोलस पुरनले २६ बलमा समान ६ छक्का र चौकासहित सर्वाधिक ७० रन जोडे। दोस्रो विकेटका लागि पुरन र मिचेल मार्शले १ सय १६ रनको शतकीय साझेदारी गरे। मार्शले ३१ बलमा ७ चौका र २ छक्काको सहयोगमा ५२ रन बनाएका थिए।
कप्तान ऋषभ पन्त १५ बलमा १५ रनमा आउट हुँदा अब्दुल समाद ८ बलमा २ चौका र २ छक्काको सहयोगमा २२ रनमा अविजित रहे। आयुष बदोनी ६ रनमा आउट हुँदा डेविड मिलर १३ रनमा अविजित रहे।
हैदराबादका लागि कप्तान प्याट कमिन्सले २ तथा मोहम्मद सामी, हर्षल पटेल र एडम जाम्पाले समान १ विकेट लिए।
यसअघि, घरेलु मैदान राजिव गान्धि अन्तर्राष्ट्रिय क्रिकेट स्टेडियममा टस हारेर ब्याटिङको निम्तो पाएको हैदराबादले निर्धारित २० ओभरमा ९ विकेट गुमाएर १ सय ९० रनको योगफल तयार गर्यो।
हैदराबादका लागि ओपनर ट्राभिस हेडले सर्वाधिक ४७ रन जोडे। उनले २८ बलमा ५ चौका र ३ छक्का प्रहार गरे। अनिकेत बर्माले १३ बलमा ५ छक्काको सहयोगमा ३६ रन जोडे। नितिश कुमार रेड्डि २८ बलमा ३२, हेनरिक क्लासेन १७ बलमा २६ र अभिषेक शर्मा ६ रनमा आउट भए।
पहिलो खेलमा राजस्थान रोयल्सविरुद्ध शतक बनाएका इशान किशन पहिलो बलमा नै आउट भए। कप्तान कमिन्स ४ बलमा ३ छक्काको सहयोगमा १८ रन जोड्दै आउट भए।
लखनउको लागि शार्दुल ठाकुरले ४, आवेश खान, दिग्वेश राठी, रवि बिष्नोई र प्रिन्स यादवले समान १ विकेट लिए।
पुनः लखनउले पहिलो खेलमा दिल्ली क्यापिटल्ससँग पराजित भएको थियो, भने हैदराबादले पहिलो खेलमा राजस्थानलाई हराएको थियो।
