काठमाडौं।
समाजवादी मोर्चा नेपालले शुक्रबार काठमाडौंमा आयोजित वृहत् जनसभालाई ५० हजारभन्दा बढी जनताको उत्साहपूर्ण सहभागितामा भव्य रूपमा सम्पन्न गरेको छ। गणतन्त्रको संवर्द्धन र राष्ट्रिय स्वाधीनताको संरक्षणका लागि आयोजित यो जनसभामा जनताको सक्रिय र शालीन सहभागिताप्रति मोर्चाले हार्दिक आभार व्यक्त गर्दै धन्यवाद ज्ञापन गरेको छ। मोर्चाले विशाल जनसमर्थनबाट आत्तिएका पुनरुत्थानवादी र प्रतिगामी तत्वहरूले जनसभापछि अराजकता मच्चाउँदै विभिन्न स्थानमा तोडफोड र आगजनी गरेको टिप्पणी समेत गरेको छ । समाजवादी मोर्चा नेपालले जारी गरेको प्रेस वक्तव्यम अनुसार, नेपाल कम्युनिष्ट पार्टी (एकीकृत समाजवादी) को केन्द्रीय कार्यालय, काठमाडौं जिल्ला कार्यालय र अध्यक्ष माधवकुमार नेपालका भाइ सरोज नेपालको निजी निवासमा तोडफोड र आगजनी भएको दुख व्यक्त गर्दै अनुसन्धानको माग गरेको छ । यस्तै, कान्तिपुर र अन्नपूर्ण पोस्ट जस्ता सञ्चार गृहहरूमा समेत आक्रमण भएको मोर्चाले न्यायको लागि सरकारको ध्यानाकर्षण गराएको छ ।यी हिंसात्मक र अराजक गतिविधिको समाजवादी मोर्चा नेपालले घोर भर्त्सना र निन्दा गरेको गर्दै यस्ता अपराधिक कार्यमा संलग्न तत्वहरूलाई तत्काल कानुनी दायरामा ल्याई कडा कारबाही गर्न सरकारसँग माग गरेको छ। साथै, राजनीतिक दलका कार्यालय र नागरिकको जनधनको सुरक्षाका लागि सरकारले प्रभावकारी कदम चाल्नुपर्नेमा जोड दिएको छ। घटनाले मुलुकको राजनीतिक स्थायित्व र शान्ति सुरक्षामाथि गम्भीर प्रश्न उठाएको जिकिर गर्दै सरकारले यसबारे तत्काल कस्तो कदम चाल्छ भन्ने विषयलाई आम जनताले चासोका साथ हेरिरहेका बताइएको छ ।
