काठमाडौँ।
समाजवादी मोर्चाको बैठक नेकपा एकीकृत समाजवादीको कार्यालय आलोकनगरमा बिहान साढे ८ बजेपछि सुरु भएको छ। बैठकको आयोजना शनिवार बिहान राजावादी आन्दोलनले काठमाडौँको तीनकुने क्षेत्रमा २ जनाको ज्यान लिएको घटनापछि भएको हो।
यसअघि समाजवादी मोर्चाको बैठक ११ बजेका लागि तय गरिएको थियो, तर घटनाको गंभीरता र राजावादीहरूको हिंसात्मक गतिविधिको विरोध स्वरूप बैठकलाई आकस्मिक रूपमा अघि सारिएको नेताहरूले जानकारी दिएका छन्।
शुक्रबार समाजवादी मोर्चाले भृकुटीमण्डपमा गणतन्त्रको पक्षमा प्रदर्शन र सभा आयोजना गरेको थियो। यसैबीच, बैठकमा समाजवादी मोर्चाका प्रमुख नेताहरू उपस्थित छन्, जसमा नेकपा अध्यक्ष विप्लव, नेकपा माओवादी केन्द्रका अध्यक्ष प्रचण्ड, महासचिव देव गुरुङ, नेकपा एकीकृत समाजवादीका अध्यक्ष माधव नेपाल र नेपाल समाजवादी पार्टीका अध्यक्ष महीन्द्र राय यादवलगायत नेता सहभागि छन्।
समाजवादी मोर्चामा माओवादी केन्द्र, एकीकृत समाजवादी पार्टी, विप्लवको नेपाल कम्युनिस्ट पार्टी र नेपाल समाजवादी पार्टी आबद्ध छन्।
