बाँके।
इण्डियन प्रिमियर लिग (आइपिएल) २०२५ मा सनराइजर्स हैदराबादलाई कोलकाता नाइट राइडर्सले ८० रनको फराकिलो अन्तरले हराएको छ। यो हैदराबादको लगातार तेस्रो हार हो, जसले उनीहरूको यात्रा अझै कठिन बनाएको छ।
कोलकाताले पहिले ब्याटिङ गर्दै निर्धारित २० ओभरमा २ सय रन बनायो। वेंकटेस अय्यरले २९ बलमा ६० रनको उत्कृष्ट योगदान दिए भने रिंकु सिंहले १७ बलमा ३२ रन बनाए। कप्तान अजिंक्य रहाणे र अंगकृष्ण रघुवंशीबीच ८१ रनको साझेदारीको मद्दतले कोलकाताले २ सय रनको चुनौती प्रस्तुत गर्यो।
जवाफमा, हैदराबाद २ सय १ रनको लक्ष्य पछ्याउँदै १६.४ ओभरमा १ सय २० रनमै समेटियो। हेनरिक क्लासेनले २१ बलमा ३३ रन बनाउँदा कमिन्डु मेन्डिसले २७ रन जोड्दा पनि, हैदराबादका प्रमुख ब्याट्सम्यानहरू छिटो आउट भए। कोलकाताका बलर बैभव अरोरा, वरुण चक्रवर्ती र आन्द्रे रसेलले शानदार प्रदर्शन गर्दै हैदराबादको इनिङ्गलाई समाप्त गरे।
यस जितसँगै कोलकाता तालिकामा ४ अंकका साथ पाँचौं स्थानमा उक्लिएको छ, जबकि हैदराबाद ४ खेलमा २ अंकका साथ तालिकाको पुछारमा छ।
