बाँके।
नेपाल विद्युत प्राधिकरणका निवर्तमान कार्यकारी निर्देशक कुलमान घिसिङले बक्यौता रकम उठाउन दबाबको कारण आफूलाई पदबाट बर्खास्त गरिएको दावी गरेका छन्। उनले शुक्रबार आयोजित पत्रकार सम्मेलनमा भने, “प्राधिकरणको डेडिकेटेड र ट्रंक लाइनको बक्यौता महशुल उठाउने प्रयास नै मेरो पदबाट हट्नुपर्ने मुख्य कारण बन्यो।”
घिसिङका अनुसार, बक्यौता नउठाउने विभिन्न दबाब र आग्रहको सामना गर्दा उनले आफ्नो कर्तव्य पूरा गर्दै दबाबलाई अस्वीकार गरे। उनले थपे, “संस्था र राज्यप्रति घात गर्न मेरो नैतिकताले अनुमति दिएन, त्यसैले बक्यौता उठाउने मेरो प्रयास नै पदबाट हट्नुपर्ने प्रमुख कारण बन्यो।”
घिसिङले आफ्नो कार्यकालमा मुलुकलाई ऊर्जा क्षेत्रमा आत्मनिर्भर बनाउने र छिमेकी मुलुक भारत र बंगलादेशसँग विद्युत व्यापार विस्तार गर्ने अभियानमा सक्रिय रहेको बताए। तर, उनले भने, “जुलाई महिनामा वर्तमान सरकार र ऊर्जा मन्त्रीको आगमनसँगै अनावश्यक र गैरकानुनी दबाब सिर्जना भएको थियो।”
उनले आरोप लगाउँदै भने, “प्राधिकरणको संस्थागत विकास र उन्नतिका कामहरू प्रभावकारी बनाउन चाहेको हुँदा म माथि सुनियोजित आक्रमण भएको छ।” घिसिङको भनाइ अनुसार, यो दबाब र आक्रमण कुन कारण र कसका लागि गरिएको भन्ने कुरा स्पष्ट छ।
यसअघि, मन्त्रिपरिषदको बैठकले कुलमान घिसिङलाई कार्यकारी निर्देशक पदबाट बर्खास्त गर्दै हितेन्द्रदेव शाक्यलाई नियुक्त गरेको थियो।
