काठमाडौं।
नेकपा (एमाले) का सांसद रघुजी पन्तले काठमाडौंको तीनकुनेमा भएको राजावादीको हिंसात्मक प्रदर्शनको बारेमा न्यायिक छानबिन आयोग गठन नगर्नुपर्ने बताएका छन्। आज प्रतिनिधिसभाको राज्य व्यवस्था तथा सुशासन समितिको बैठकमा उनले भने, “आपराधिक घटनामा सरकारले न्यायिक आयोग गठन गर्न हुँदैन? शान्तिपूर्ण आन्दोलनमा क्षति भए मात्र आयोग गठन गरिनुपर्छ।”
सांसद पन्तले प्रदर्शनको विषयमा पूर्वराजा ज्ञानेन्द्र शाहको समेत बयान लिनुपर्ने सवाल उठाएका छन् । उनले भनेका छन् , “श्री ५ भनेर सूचना जारी गर्न लगाउने र त्यसमा संलग्न व्यक्तिलाई किन कारबाही नगरेको?” उनले प्रश्न गरे।
पन्तले राजावादी प्रदर्शनको योजनामा दुर्गा प्रसाईंको संलग्नता रहेको आरोप पनि लगाए र उनलाई अनुसन्धानको दायरामा ल्याउनुपर्ने माग गरे। उनले गृहमन्त्रीलाई प्रश्न गर्दै भने, “तोडफोड र आगजनीको सम्भावना थियो भन्ने जानकारी भएको अवस्थामा दुई फरक प्रदर्शन एकै दिन गर्न दिने निर्णय किन गरियो?”
चैत १५ गते भएको हिंसात्मक प्रदर्शनमा दुईजनाको ज्यान गएको थियो, जब राजावादी प्रदर्शन शान्तिपूर्ण नभइ हिंसात्मक बन्यो। यसै दिन, काठमाडौँको भृकुटीमण्डपमा समाजवादी मोर्चाले शान्तिपूर्ण प्रदर्शन गरेको थियो।
