काठमाडौं।
काठमाडौं उपत्यका प्रहरी कार्यालय रानीपोखरी र नेपाल औषधि व्यवसायी संघ बागमती प्रदेशले संयुक्त रुपमा ‘औषधिजन्य लागूऔषध दुरूपयोग नियन्त्रण’ विषयक सचेतनामूलक कार्यक्रम सम्पन्न गरेको छ। नेपाल पुलिस क्लब, भृकुटी मण्डपमा आयोजित यस कार्यक्रममा प्रहरी अतिरिक्त महानिरीक्षक टेक बहादुर तामाङ प्रमुख अतिथिका रुपमा उपस्थित थिए।
कार्यक्रममा प्रहरी अतिरिक्त महानिरीक्षक तामाङले लागूऔषध दुर्व्यसनको निराकरणका लागि समाजका सबै सरोकारवाला निकायको समन्वय आवश्यक रहेको उल्लेख गर्दै, भविष्यमा अन्य संस्थासँग समेत सहकार्य र समन्वय गर्दै जाने प्रतिबद्धता जनाउनुभयो। उहाँले यसका लागि प्रहरीको एकल प्रयास पर्याप्त नहुने र सबैको एकतासहित मात्र यो समस्याको समाधान सम्भव हुने बताउनुभयो।
सो अवसरमा प्रहरी अतिरिक्त महानिरीक्षक तामाङ र बागमती प्रदेश नेपाल औषधि व्यवसायी संघका अध्यक्ष ध्रुव नारायण श्रेष्ठ बीच लागूऔषध विरूद्ध आपसी सहयोग र समन्वय सम्बन्धी समझदारीपत्र आदानप्रदान गरिएको थियो।
कार्यक्रममा औषधि व्यवस्था विभागका महानिर्देशक नारायण ढकाल, वरिष्ठ हृदय रोग विशेषज्ञ डा. ओम मूर्ति अनिल लगायतले शुभकामना मन्तव्य व्यक्त गरेका थिए। प्रहरी वरिष्ठ उपरीक्षक नवराज अधिकारीले लागूऔषधको परिचय, वर्गिकरण, असरहरू र कानूनी प्रावधानको बारेमा प्रस्तुतीकरण गरेका थिए।
कार्यक्रममा जीवन विज्ञान प्रतिष्ठानका प्रशिक्षक, नेपाल औषधि व्यवसायी संघका अध्यक्षहरू र प्रतिनिधिहरू, औषधि व्यवसायीहरू र प्रहरी अधिकारीहरूको उल्लेखनीय उपस्थिती रहेको थियो।
