काठमाडौं।
नेपालमा पछिल्लो एक वर्षको अवधिमा प्रेस स्वतन्त्रता हननसम्बन्धी ७३ वटा घटना भएका छन्। नेपाल पत्रकार महासङ्घ, सञ्चार अनुगमन इकाइले दिएको विवरण अनुसार २०२४ मे ४ देखि २०२५ अप्रिल ३० सम्मका घटनामा १ सय ५१ जना पत्रकार र पाँच वटा सञ्चार संस्था आक्रमणको शिकार भएका हुन्।
महासङ्घका महासचिव रामप्रसाद दाहालका अनुसार उक्त अवधिमा दुई जना पत्रकारको हत्या भएको छ। यस्तै, पेशागत असुरक्षासम्बन्धी १६ वटा घटनासमेत अभिलेख भएका छन्।
महासङ्घले शनिबार, विश्व प्रेस स्वतन्त्रता दिवसको अवसरमा तथ्याङ्क सार्वजनिक गर्दै पत्रकारहरूमाथि धम्की, धरपकड, दुव्र्यवहार र हिंसात्मक घटनाहरू लोकतन्त्रमाथिकै गम्भीर प्रहार भएको जनाएको छ।
विशेषगरी गत चैत १५ गते काठमाडौँ तीनकुनेमा भएको हिंसात्मक आन्दोलनमा पत्रकार सुरेश रजकको हत्या, सञ्चारमाध्यममाथि भएको आगजनी र आक्रमण, शिक्षक आन्दोलनको समाचार संकलनमा खटिएकी पत्रकार सविना कार्कीमाथिको ज्यादती, र घरानका पत्रकार गोपाल दाहालमाथि स्थानीय सरकार प्रमुखबाटै भएको धम्की र मानसिक यातनालाई महासङ्घले निन्दनीय बताएको छ।
विश्व प्रेस स्वतन्त्रता दिवस सन् १९९३ देखि प्रत्येक वर्ष मे ३ मा मनाइँदै आएको छ। यस दिवसको सुरुवात सन् १९९१ मा नामिबियाको विन्डहोकमा भएको पत्रकार सम्मेलनपछि गरिएको घोषणा–पत्रसँग सम्बन्धित छ, जसलाई युनेस्को र संयुक्त राष्ट्रसङ्घले अनुमोदन गरेका थिए।
