काठमाडौँ । इन्डियन आइडल सिजन १२ का बिजेता गायक पवनदीप राजनको भयानक कार दुर्घटनामा परेका छन् । दुर्घटनामा गम्भीर घाइते भएका पवनदीपको स्वास्थ्य बारे नयाँ अपडेट आएको छ ।मंगलबार बिहान, उनको टोलीले उनको स्वास्थ्यको बारेमा जानकारी दिँदै आधिकारिक विज्ञप्ति जारी गरेको छ । विज्ञप्तिमा पवनदीपलाई धेरै गम्भीर चोटपटक लागेको, जसमध्ये केही फ्र्याक्चरको शल्यक्रिया गरिएको छ, जबकि बाँकी चोटपटकको उपचार आगामी केही दिनमा गरिने उल्लेख छ । उनकी बहिनीले पनि फ्यानहरूलाई पवनदीपको फोटो वा भिडियो सेयर नगर्न र उनको शीघ्र स्वास्थ्यलाभको लागि प्रार्थना गर्न भावनात्मक अपील गरेकी छिन् ।पवनदीपको टोलीले एक विज्ञप्तिमा भनेको छ, ‘पवनदीपलाई धेरै गम्भीर फ्र्याक्चर र केही सामान्य चोटपटक लागेको छ । दुर्घटना पछिको दिन उनको परिवार र शुभचिन्तकहरूका लागि धेरै कठिन थियो। उनी दिनभरि अत्यधिक पीडामा र बेहोस थिए । धेरै जाँच र परीक्षण पछि, उनलाई सोमबार साँझ ७ बजे अपरेशन थिएटरमा लगिएको थियो । छ घण्टाको शल्यक्रिया पछि, उनका केही प्रमुख फ्र्याक्चरहरूको सफलतापूर्वक उपचार गरिएको छ । हाल पवनदीप मेडिकल आईसीयूमा डाक्टरहरूको निगरानीमा छन् । तीन-चार दिनको आरामपछि उनको बाँकी चोटपटक र फ्र्याक्चरको शल्यक्रिया मार्फत उपचार गरिने छ ।’रिपोर्टका अनुसार पवनदीप चढेको कार चम्पावतबाट दिल्ली आउँदैगर्दा उत्तरप्रदेशको अमरोहामा दुर्घटनामा परेको हो । राजमार्गमा रोकिएको क्यान्टरमा पछाडिबाट कार ठोक्किएको प्रहरीले बताएको रिपोर्टमा उल्लेख छ ।अहिले उनको नोयडास्थित फोर्टिस अस्पतालमा उपचार भइरहेको बताइएको छ ।
