राप्रपाको पार्टी कार्यालयमा कमल थापा, लिङदेनसँग अर्थपूर्ण वार्ता

काठमाडौँ । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन र राप्रपा नेपालका अध्यक्ष कमल थापाबीच भेटवार्ता भएको छ ।

आइतबार राप्रपा मुख्यालय धुम्बाराही पुगेका थापाले लिङदेनसँग भेटवार्ता गरेका हुन् ।

भेटपछि लिङ्देनले थापालाई भेटेको तस्बीर सामाजिक सञ्जालमा राखेका छन् । भेटवार्तामा जेठ १५ बाट घोषणा गरिएको आन्दोलनसहित समसामयिक राजनीतिक विषयमा कुराकानी भएको बताइएको छ ।

राप्रपाबाट अलग भएर राप्रपा नेपाल बनाएपछि थापा पहिलो पटक राप्रपा केन्द्रीय कार्यालयमा पुगेका हुन् । राजसंस्थाको पक्षमा एक ठाउमा बसेर आन्दोलन गर्ने लक्ष्यसहित पछिल्ला दिनहरुमा थापा र लिङदेन नजिकिएका छन् । हाल राजसंस्थाको पक्षमा आन्दोलन गर्न कार्यगत एकता गरेका थापा र लिङदेनले निकट भविष्यमा पार्टी एकतासम्म गर्नेगरि छलफलमा रहेको बताइएको छ ।