रसुवामा आएको बाढीमा बर्दियाका पाँच जना बेपत्ता भएका छन् ।
जिल्लाकाे बारबर्दियाबाट रसुवामा काम गर्न गएका पाँच युवाहरू बेपत्ता भएका हुन् ।
उत्तरी छिमेकी राष्ट्र चीनतर्फबाट रसुवागढी नाका भई नेपाल प्रवेश गरी भोटेकोशी नदीमा आएको बाढीमा बर्दियाका ५ जना नागरिक बेपत्ता भएको जानकारी प्राप्त भएको कुरा जिल्ला प्रशासन कार्यालय बर्दियाका सहायक प्रमुख जिल्ला अधिकारी राेशन कुमार कठायतद्वारा जारी पत्रमा उल्लेख गरिएकाे छ ।
साे पत्रमा निजहरुको स्थायी ठेगाना एकीन नभएकाे र खोजीका लागि प्रशासन कार्यालयले सम्बन्धित निकायमा पहल गरिरहेकाे जनाईएकाे छ ।
बारबर्दिया नगरपालिका वडा नं. १० बस्ने जिपन चौधरी, सन्तोष दहित, बुद्धिराम थारु, लक्ष्मीनारायण थारु र सुरेश थारु बेपत्ता भएकाे कुरा स्राेतले बताए ।
स्राेतका अनुसार घटनास्थलमा नेपाली सेना, सशस्त्र प्रहरी तथा नेपाल प्रहरी परिचालन गरिएको छ । बेपत्ता जिपन चौधरीले गए राति घरपरिवारसँग कुरा गरेका थिए । बाढीपछि उनीहरू सम्पर्कविहीन भएका हुन् । सरकार समक्ष बेपत्ता भएका उल्लेखित व्यक्तिहरूलाई यथाशीघ्र खाेजी गरिदिन बेपत्ताका परिवारजनहरूले अत्यन्तै दुखका साथ हारगुहार गरेका छन् । उक्त बाढीमा जिल्लाका ५ जना लगायत १९ जना सम्पर्क विहिन भएकाे विभिन्न संचार माध्यममा आएकाे छ ।
