बर्दिया —
बर्दियाको गुलरियामा लघुवित्त तथा वित्तीय शोषण विरुद्ध संघर्ष समितिले पत्रकार सम्मेलनको आयोजना गरी सरकार समक्ष ‘नव सामन्ती’ लघुवित्त खारेज लगायतका माग गरेको छ ।
लघुवित्त तथा वित्तीय संस्थाले ग्रामीण महिलामाथि चरम आर्थिक र मानसिक शोषण गरिरहेको भन्दै उक्त समितिले ती संस्थाहरूलाई खारेज गरी लघुवित्त पीडितलाई न्याय दिन सरकार समक्ष माग राखेको हो ।
वित्तिय उत्पिडन विरुद्धको महिला सञ्जाल नेपालका केन्द्रिय संयोजक आशा कुमारी शन्जेलले लघुवित्त संस्था ‘नव सामन्ती’को रूपमा विकसित भइरहेको बताउनुभयो । उहाँले सामूहिक रूपमा अन्यायपूर्ण ऋण लगाएर महिलाहरूलाई आत्महत्या गर्न बाध्य बनाइ लघुवित्त संस्थाहरूले ग्रामीण जीवन तहसनहस बनाएको धारणा राख्नुभयो ।
संयोजक शन्जेलले भन्नुभयो, “हामीले धेरै पटक ध्यानाकर्षण गरायौं । तर अब पनि सरकार मौन बस्यो भने लघुवित्त संस्थालाई गाउँ–गाउँमा खोजी–खोजी लखेट्ने बाध्यता आउनेछ । लघुवित्त संस्थाले महिलालाई आर्थिक हिंसामा पारिरहेको छ । हाम्रो मागलाई सरकारले वेवास्ता ग¥यो भने समितिले देशभर चरणबद्ध आन्दोलन गर्ने छ ।”
समितिले लघुवित्तद्वारा लगाइएका ऋणहरू अवैधानिक रूपमा वसुली गरेकोले ऋण तुरुन्त मिनाहा गर्नुपर्ने, महिलाहरूको नाम कालोसूचीमा राखेकोले सो सूची फुकुवा गर्नुपर्ने र धितो लिलामी रोक्नुपर्ने लगायतको मागलाई सरकारले यथाशिघ्र सम्बोधन गर्नुपर्ने कुरा लघुवित्त तथा वित्तीय शोषण विरुद्ध संघर्ष समिति बर्दियाका अध्यक्ष खुमलाल थारुले जानकारी गराउनुभयो ।
उहाँले महिला सञ्जाल नेपाल, पीडित ऋणीहरू, युवा अभियन्ता तथा मानव अधिकारकर्मीहरूको समेत ऐक्यबद्धता रहेको यो संघर्ष अभियानले स्थानीय स्तरमै लघुवित्त शोषणविरुद्ध चर्को प्रतिवाद सुरु गरिसकेको छ, भन्नुभयो ।
