चन्द्र वि.क.
बर्दिया
जिल्ला भूमि अधिकार मञ्च, बर्दियाले भूमि ऐन २०७६ कार्यान्वयन र निस्सा पाएकाहरुको जग्गा नापी लगायतको माग गर्दै गुलरियामा दबाबमूलक ¥याली प्रदर्शन गरेको छ ।
“सामाजिक न्याय र समुन्नतीको लागि भूमि अधिकार” भन्ने मुल नाराका साथ जिल्लामा लामो समयदेखि थाँती रहेका भूमि सम्बन्धी अन्यायपूर्ण स्थिति विरुद्ध सरकारलाई ध्यानाकर्षण गराउन र सम्बन्धित निकायमा दबाव सिर्जना गर्न मञ्चले शान्तिपूर्ण ¥याली प्रदर्शन गरेको हो ।
मञ्चले प्रमुख जिल्ला अधिकारी, डिभिजन वन कार्यालय र भुमि समस्या समाधान आयोग जिल्ला समिति बर्दिया मार्फत सरकारलाई तत्काल भूमि ऐन २०७६ कार्यान्वयन गरी स्पष्ट नीतिगत आधार तयार गर्न, नापी कार्य सम्पन्न गर्न र भूमिहीन, दलित तथा सीमान्तकृत समुदायको हक सुनिश्चित गर्न लगायतको माग सहित ज्ञापन पत्र बुुझाएको कुरा जिल्ला भूमि अधिकार मञ्च, बर्दियाका अध्यक्ष केश बहादुर वि.क.ले जानकारी गराउनुभयो ।
उहाँले भूमि अधिकार सम्बन्धी मुद्दामा सरकारको अस्पष्ट नीति, निष्क्रियता र ढिलासुस्ती प्रवृत्तिप्रति गम्भीर आपत्ति भएको बताउँदै भन्नुभयो, “न्याय पाउने आशामा बसेका नागरिक आज पनि अपमानित भइरहेका छन् । अब हामी चुप बस्दैनौं । यदि हाम्रो मागहरू सम्बोधन नभए थप सशक्त आन्दोलन गर्नेछौें ।”
गुलरियाको ७ नम्बर वडा कार्यालय नजिक देखि मुख्य बजार हुँदै जिल्ला प्रशासन कार्यालय, डिभिजन वन कार्यालय र भुमि समस्या समाधान आयोग जिल्ला समिति बर्दिया गएर ¥याली समापन भएको थियो । ¥यालीमा सहभागीहरूले “भूमि ऐन २०७६ कार्यान्वयन गर, निस्सा पाईयो, लालपुर्जा चाहियो, कृष्णसार संरक्षण क्षेत्रका सुकुम्वासीलाई व्यवस्थापन गर र जालसाँजी पुर्वक बनेका गैर जोताहाका पुर्जा खारेज गर” भूमिहीनलाई न्याय दे” जस्ता नारा लगाएका थिए ।
