लुम्बिनी प्रदेश सामाजिक विकास मन्त्री जन्मजय तिमिल्सिनाले बर्दिया अहिले लुम्बिनी प्रदेशमा विकासको सम्भावना र छलफलको प्रमुख बिषय बनेको बताउनु भएकाे छ ।
जिल्लाकाे बढैयाताल गाउँपालिका–८ स्थित पशुपतिबजारमा रहेको बर्दिया अपाङ्ग पुनर्स्थापना केन्द्रमा आयोजित निशुल्क सहयोगी सामग्री वितरण कार्यक्रमलाई सम्बाेधन गर्दै उहाँले साे कुरा बताउनु भएकाे हाे ।
प्रदेशमा मन्त्री तिमिल्सिनाले जिल्लाको पर्यटन, कृषि, शिक्षा, स्वास्थ्य लगायतको विकासलाई कसरी अगाडि बढाउने र समृद्धि कसरी छाउने भन्ने बिषयमा छलफल हुने उल्लेख गर्नुभयाे ।
“बर्दियाको समृद्धिलाई प्रदेश सरकारले उच्च प्राथमिकतामा राखेको छ,” मन्त्री तिमिल्सिनाले भन्नुभयाे, “जनताको सुख–दुखमा सधैं साथ रहने मेरो दायित्व हो, सबै समुदायका लागि समान अवसर सुनिश्चित गर्न म प्रतिबद्ध छु ।”
सामाजिक विकास मन्त्री तिमिल्सिनाकाे पहलमा जिल्लाका विभिन्न पालिकाका ३१ जना अपाङ्ग व्यक्तिहरूलाई ल्यापटप, ट्राईसाइकल, व्हिल चियर र बैशाखी लगायतका सामग्री वितरण गरिएकाे बर्दिया अपाङ्ग पुनर्स्थापना केन्द्र, गुलरिया बर्दियाकाे अध्यक्ष नेत्र सापकाेटाले जानकारी गराउनुभयाे ।
उहाँले अपाङ्ग भएका व्यक्तिहरूलाई गरेको सहयोगप्रति कृतज्ञता व्यक्त गर्दै आगामी दिनमा जिल्लाभरि रहेका सम्पूर्ण अपाङ्ग व्यक्तिहरूलाई उल्लेेखित सामग्री उपलब्ध गराइदिन मन्त्री तिमिल्सिना समक्ष अनुरोध गर्नुभयो ।
कार्यक्रम सामाजिक विकास डिभिजन कार्यालय बाँकेकाे सहयाेग, बर्दिया अपाङ्ग पुनर्स्थापना केन्द्र, गुलरियाकाे सहकार्य र अपाङ्गता सशक्तिकरण एवं सञ्चार केन्द्र (डेक नेपाल) काेहलपुर,बाँकेकाे आयाेजनामा भएकाे थियाे ।
यस्ता कार्यक्रमहरूले अपाङ्गता भएका व्यक्तिहरूकाे आत्मविश्वास बढाउनुका साथै समावेशीतामा आधारित समाज निर्माणका लागि बलियो आधार तयार पार्ने अपेक्षा गरिएको छ ।
