रन्जित बिक्रम शाह
बर्दिया –
बर्दिया प्रहरीले करिब तीन लाख बराबरको अवैध फेन्सी सामान नियन्त्रण लिएको छ ।
जिल्ला प्रहरी कार्यालय बर्दिया मातहत रहेको इलाका प्रहरी कार्यालय ढोढरीबाट खटिएको प्रहरी गस्ती टोलीले ठूलो परिमाणको अवैध फेन्सी सामान नियन्त्रण लिएको हो ।
जिल्लाको मधुवन नगरपालिका वडा नं. ३ स्थित धनौरा सिमलचोकमा प्रहरीले अवैध रूपमा नेपाल ल्याउँदै गरेको फेन्सी कपडा नियन्त्रणमा लिएको इलाका प्रहरी कार्यालय ढोढरीले जनाएको छ ।
शुक्रबार राति करिब ९ः३० बजेको समयमा भारतबाट भन्सार छलि नेपाल तर्फ ल्याउदै गरेको ३ सय १० पिस फेन्सी सामान पक्राउ गरिएको प्रहरीले बताए ।
प्रहरीका अनुसार नियन्त्रणमा लिइएका सामानमा २ सय ६८ पिस कुर्ता–सुरुवाल र ४२ पिस बच्चाको फ्र्याक समावेश छन् । बरामद सामान आवश्यक कारबाहीका लागि गुलरिया भन्सार कार्यालय पठाइएको छ ।
बर्दिया प्रहरीले जिल्लामा शान्ति सुरक्षा कायम गर्न विभिन्न सचेतना मुलक कार्यक्रम गर्नुका साथै अवैध क्रियाकलाप नियन्त्रण गर्न सीमामा निगरानी समेत कडा पारिएको प्रहरीद्धारा जनाईएको छ ।
