बर्दिया —
बर्दियाको गुलरिया नगरपालिका वडा नं. १२, भैसाहीमा चितुवाको आक्रमणबाट एक महिलाको मृत्यु भएको छ ।
शुक्रबार बेलुकी खेतमा धान गोड्न गएकी ४५ वर्षीया जगतरानी थारु शनिबार बिहान खेत नजिकैको उखुबारीमा मृत अवस्थामा भेटिएकी हुन् ।
घटनापछि स्थानीयबासीले गुलरिया बजारमा ¥याली प्रदर्शन गर्दै जिल्ला प्रशासन कार्यालय बर्दियालाई बाघ नियन्त्रणमा लिन र अब यस किसिमको घटना नदोहरिने सुनिश्चित गर्न ठोस कदम चाल्नुपर्ने लगायतका माग गरेका छन् ।
घटनास्थलमा मृतकको साइकल, घाँस भएको बोरा, फरुवा र हँसिया फेला परेको थियो । त्यहाँ चितुवाको पञ्जाको छाप र रगतको टाटो पनि देखिएको थियो ।
स्थानीय सुरज चौधरीले मृतकको शरीर टाउको अलग भएको अवस्थामा फेला परेको जानकारी दिँदै भन्नुभयो, “यस क्षेत्रमा पटक–पटक चितुवा, पाटेबाघ देखिँदै आएका छन् । सम्बन्धित निकायलाई जानकारी दिँदा पनि चासो दिइएको छैन ।”
चौधरीले मृतकका श्रीमान् रामलखन थारु रोजगारीका लागि जुम्ला र जेठा छोरा विकास थारु पोखरामा रहेको बताउनुभयो । अचानक भएको घटनाले गाउँमा त्रास फैलाएको स्थानीयले बताएका छन् ।
बर्दिया अस्पतालमा पोस्टमार्टम गरी राखिएको शवलाई घर परिवार तथा स्थानीयले चितुवा बाघ नियन्त्रण नभएसम्म शव नबुझ्ने अडान लिएका छन् ।
पछिल्लो समय बर्दियामा चितुवा, पाटेबाघ लगायत वन्यजन्तुको आक्रमण बढ्दै गएको छ, जसले मानिस र पशुपन्छीमा ठूलो क्षति पु¥याइरहेको छ । मानव–वन्यजन्तु सह–अस्तित्व कायम राख्न सम्बन्धित निकायले तत्काल ठोस कदम चाल्नु पर्ने देखिन्छ ।
