बर्दिया-
जिल्ला प्रशासन कार्यालय बर्दियाद्वारा पछिल्ला केही दिनयता जारी गरिएको कर्फ्यू हटाईएकाे छ ।
कर्फ्यू हटाई प्रशासनले सुरक्षा संवेदनशीलतालाई ध्यानमा राख्दै सदरमुकाम गुलरियाको केही क्षेत्रमा प्रत्येक दिन साँझ ६ बजेदेखि बिहान ६ बजेसम्म आंशिक निषेधाज्ञा जारी गरेकाे हाे ।
यहि भदौ २३ गते गुलरिया बजार क्षेत्रमा उच्छृंखल समूहले सुरक्षाकर्मी र सरकारी कार्यालयमाथि गरेकाे आक्रमण र २४ गते जेन जेड (Gen-Z) समूहको देशव्यापी आन्दोलनका क्रममा गुलरिया नगरपालिका क्षेत्रमा आगजनी र तोडफोडका घटना भएकापछि कर्फ्यू लगाइएको थियो ।
जिल्ला प्रशासन कार्यालयले विज्ञप्ति जारी गर्दै शान्ति सुरक्षामा सहयोग पुर्याएकोमा जिल्लावासीप्रति धन्यवाद व्यक्त समेत गरेको छ ।
प्रमुख जिल्ला अधिकारी सुरेन्द्र पौडेलद्वारा जारी विज्ञप्तिमा भनिएको छ, “नागरिकको अनुशासन, धैर्यता र सुरक्षाकर्मीलाई देखाइएको साथका कारण सम्भावित अप्रिय घटना टार्न हामिलाई सहज भयाे । शान्ति, कानूनको पालना र आपसी सद्भाव सबैको सामूहिक जिम्मेवारी हो । सहयोग र संयम जारी राख्न नागरिकसँग अपिल छ ।”
प्रशासनले अझै सतर्क रहन आग्रह गर्दै शंकास्पद गतिविधि, असामान्य भीडभाड वा अराजक संकेत देखिएमा तत्काल प्रहरी वा सम्बन्धित सुरक्षा निकायलाई जानकारी गराउन अनुरोध गरेको छ ।
निषेधाज्ञा भने गुलरियाकाे पूर्वमा गणेशपुर चोक, पश्चिममा बबई क्याम्पस, उत्तरमा जिल्ला समन्वय समितिको कार्यालय र दक्षिणमा भारतीय सीमा नाकासम्म जारी रहने छ ।
