बिर्तामोड साउन१३ ।। महिला एसिया कप टी २० प्रतियोगिताको उपाधि श्रीलंकाले जितेको छ । अाइतबार सम्पन्न फाइनलमा भारतविरुद्ध ८ विकेटको जीत निकाल्दै श्रीलंकाले उपाधि उचालेको हाे । १६६ रनको लक्ष्य पछ्याएको श्रीलंकाका लागि १८ औँ ओभरको चौथो बलमा काभिसा दिलहरीले छक्का प्रहार गर्दै जीत दर्ता गरेकी हुन् ।
जीतका लागि ब्याटिङतर्फ श्रीलंकाकी हर्सिता सामराविकरामाले अविजित रहँदै फाइनल खेलकै सर्वाधिक ६९ रन जोडेकी थिइन् । उनले २ छक्का र ६ चौकाको मद्दतमा ५१ बलमा सो रन जोडेकी हुन् । त्यस्तै क्याप्टेन चमारी अथपथ्थुले २ छक्का ९ चौकाको मद्दतमा ६१ रन जोडेकी थिइन् ।
खेलको सुरुवातमा भिसमी गौनरन्तेलाई गुमाएको श्रीलंकन् महिला खेलाडी त्यसपछि भने डटेर भारतीय बलिङको सामना गरेका थिए । दुई खेलाडीको अर्धशतक र काभिसा दिलहरीको धमाकेदार ब्याटिङसँगै श्रीलंकाले उपाधि हासिल गर्न सफल भएको हाे । दिलहरीले १६ बलमा ३० रन जोडेपछि भारत खेलमा फर्किन सकेन ।
भारतीय बलिङमा दिप्ती शर्माले एक मात्र विकेट निकाल्न सफल भइन् । अरु कुनै बलरले विकेट लिन सकेनन् । भिसमी भने रनआउट भएकी थिइन् ।
ब्याटिङ तर्फ भने अर्धशतकीय पारी खेल्दै स्मृति मन्दनाले ६० रन जोड्न सफल भइन् । उनी दिलहरीको बलमा क्याच आउट भएकी थिइन् । रिचा घोषले ३०, चमम रौद्रिगसले २९, सफली वर्माले १६ र क्याप्टेन हमनप्रित कौरले ११ रन जोडे भने अरु खेलाडीले दोहोरो अंक समेत बनाउन सकेनन् ।
श्रीलंकन बलिङतर्फ दिलहरीले २ विकेट लिइन् भने उदेशिका प्रवोदनी, सचिनी निसान्साला, चमारी अथपत्थुले १-१ विकेट लिएका थिए । टस जितेर ब्याटिङ रोजेको भारतलाई १६५ रन राेक्दै श्रीलंकाले ६ विकेट लिएको थियो । खेलको प्लेयर अफ द म्याच श्रीलंकाकी हर्सिता बनिन् भने प्लेयर अफ दि सिरिज चमारी अथपथ्थु बनेकी छन् ।
भारत महिला एसिया कपको फाइनलमा नवौँ पटक पुगेको थियो । भारत आठौंपटक विजेता बन्न वञ्चित भएको छ । उपाधि यात्राको निरन्तरतालाई ब्रेक लगाउँदै आयोजक श्रीलंका घरेलु मैदानको फाइदा उठाउँदै उपाधि उचाल्न सफल भएको छ । श्रीलंकाले महिला एसिया कपको उपाधि पहिलोपटक जितेको हो ।
