काठमाडौं।
राष्ट्रिय सहकारी महासंघले अन्तर्राष्ट्रिय सहकारी वर्ष २०२५ को अवसरमा ६८औं राष्ट्रिय सहकारी दिवस मनाउने घोषणा गरेको छ। यस वर्षको राष्ट्रिय सहकारी दिवस चैत २० गते मनाइनेछ। यस विशेष अवसरको लागि तय गरिएको थिम “मर्यादित सहकारीः समुन्नत समाज” रहेको छ ।
सहकारी दिवसको उद्देश्य सहकारीलाई वित्तीय अनुशासन, सुशासन, पारदर्शिता, स्वावलम्बन र सामाजिक उत्तरदायित्वका मूल्यहरूसँग जोडेर नेपाली समाजको समृद्धि र समान अवसरयुक्त आर्थिक विकासमा टेवा पुर्याउनु हो। महासंघका अध्यक्ष ओमदेवी मल्लका अनुसार, यस दिवसको माध्यमबाट सहकारी आन्दोलनलाई अझ सशक्त बनाउने र सर्वसाधारणको विश्वास अभिवृद्धि गर्ने प्रयास गरिनेछ।
यस अवसरमा भूमि व्यवस्था, सहकारी तथा गरिबी निवारण मन्त्री बलराम अधिकारीको संयोजकत्वमा र महासंघका अध्यक्ष ओमदेवी मल्लको सह–संयोजकत्वमा एक मूल समारोह समिति गठन गरिने जानकारी दिइएको छ। यस वर्षको सहकारी दिवसका कार्यक्रमलाई नीति सुधार, सहकारी प्रवद्र्धन, र समन्वयात्मक विकासमा केन्द्रित गरिनेछ।
सरकार र सहकारी संस्थाहरू बीचको सहकार्यलाई अझ प्रभावकारी बनाउनका लागि महासंघले सबै तर्फका समन्वयको महत्वलाई औंल्याएको छ। यसले नेपालका सहकारी संस्थाहरूलाई आर्थिक स्थायित्व र सामाजिक समावेशितामा थप बल पुर्याउने विश्वास व्यक्त गरिएको छ।
