बाँके।
नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेपाली महिलाले गरेको बलिदानीपूर्ण आन्दोलनलाई नेपाल मात्र नभई विश्व राजनीतिमा पनि प्रेरणाको स्रोत भएको बताएका छन्।
अनेमसंघ क्रान्तिकारी लुम्बिनीको दोस्रो प्रदेश सम्मेलन उद्घाटन गर्दै प्रचण्डले यसो भनेका हुन्। उनले जनयुद्धको समय महिला सहभागिता सुनिश्चित गर्नको लागि विशेष ध्यान दिइएको र त्यसका कारण क्रान्तिमा महिला नेतृत्वको महत्वपूर्ण भूमिका रहेको उल्लेख गरे।
अध्यक्ष प्रचण्डले भने, “नेपाली महिलाले गरेको बलिदानीपूर्ण आन्दोलन नेपालमा मात्र होइन, संसारभरिका महिलाका लागि प्रेरणा र उर्जाको स्रोत बनेको छ।” उनले जनमुक्ति सेनामा झण्डै ४० प्रतिशत महिला सैनिक रहेको र महिला कमाण्डरहरुले नेतृत्व गरेका सबै लडाइँ जितिएका तथ्यलाई स्मरण गरे।
महिलाको सहभागिता र नेतृत्वले नेपाली राजनीतिको परिवर्तन सम्भव बनाएको प्रचण्डको भनाइ थियो। उनले थपे, “महिलाहरु चुलो चौकाबाट निस्केर बन्दुक बोकेर युद्ध मोर्चामा जान तयार नभएको भए आजको राजनीतिक परिवर्तन सम्भव थिएन।”
उक्त सम्मेलनमा प्रचण्डले पछिल्ला केही वर्षमा पार्टीले आफ्नो वर्ग र समुदायसँगको सम्बन्धमा कमजोरी आएको स्वीकार गर्दै सरकारको नेतृत्व गर्दा रुपान्तरणको अभियान सुरु गरिएको बताएका थिए। उनले भने, “यस अभियानले दलाल बिचौलियाहरु आतंकित र चिन्तित भएका छन्।”
प्रचण्डले माओवादी सरकारको पतनको कारण दलाल र बिचौलियाहरु भएको आरोप लगाउँदै सरकारको गलत नीतिहरूको विरोध गरेका छन्। उनले अब आगामी निर्वाचनमा पार्टीले आफ्नै एजेण्डा अघि बढाउने र सहकार्य नगरी एक्लै चुनाव लड्ने सङ्कल्प व्यक्त गरेका छन्।
अध्यक्ष प्रचण्डले जनतासँग माओवादी, तराई-मधेश जागरण अभियान पुनः सुरु गरिएको जानकारी पनि दिएका छन्। यस अभियानको प्रारम्भ लुम्बिनीबाट गरिएको छ।
