काठमाडौँ । जर्मन रुढीवादी नेता फ्रेडरिक मर्ज चान्सलर निर्वाचित भएका छन् । पहिलो प्रयासमा आश्चर्यजनक हार बेहोरेका मर्जले दोस्रो चरणमा जित हासिल गर्दै जर्मनीको नयाँ चान्सलर बनेका हुन् संसदमा भएको पहिलो मतदानमा उनले पराजयको सामना गर्नुपरेको थियो । तर दिउँसो भएको ‘दोस्रो मौका’ मतदानमा, मर्जले ३२५ मत प्राप्त गरे भने २८९ सांसदले उनको विपक्षमा मतदान गरेका थिए । पहिलो चरणको मतदानमा उनले ३१० मत प्राप्त गरेका थिए । जर्मनीको संसद ६३० सदस्यीय रहेको छ जितपछि फ्रेडरिक मर्जले चान्सलरको जिम्मेवारी सम्हालेका छन् । उनले आफ्नो नयाँ जिम्मेवारी सम्हाल्दै देशवासीहरूप्रति कृतज्ञता पनि व्यक्त गरे। उनले भने, ‘म जर्मनीको चान्सलरको निर्वाचनलाई कृतज्ञताका साथ स्वीकार गर्छु र सम्मान गर्छु।’ म मेरो काम साहस र आत्मविश्वासका साथ गर्नेछु, किनकि हाम्रो देश बलियो छ र अझ धेरै गर्न सक्छ !’फ्रेडरिक मर्जको जन्म नोभेम्बर ११, १९५५ मा जर्मनीको ब्रिलन शहरमा भएको थियो । उनी १९७२ देखि क्रिश्चियन डेमोक्रेटिक युनियन (सिडीयू ) का सदस्य छन्। १९७५ मा आफ्नो पढाइ पूरा गरेपछि मर्जले सेनामा सेवा गरे र त्यसपछि कानून र राजनीति विज्ञानको अध्ययन गरे। १९८९ मा उनी युरोपेली संसदको सदस्य बने र १९९४ सम्म सो पदमा रहे। यसपछि, उनी जर्मन संसद (बुन्डेस्टाग) मा निर्वाचित भए र धेरै महत्त्वपूर्ण पदहरू सम्हालेका छन् । मर्ज २०२२ मा सिडीयू पार्टीको राष्ट्रिय अध्यक्ष निर्वाचित भएका थिए । उनी २०२१ मा संसदमा फर्किए र २०२५ सम्म पार्टीको संसदीय समूहको नेतृत्व गर्नेछन् । अब ६ मे २०२५ मा, उनले आधिकारिक रूपमा जर्मनीको चान्सलरको रूपमा शपथ लिएका छन् ।
