राजविराज । चारवर्ष अघि तत्कालिन प्रधानमन्त्री केपी शर्मा ओलीद्वारा शिलान्यास गरिएको अस्पताललाई जनमत पार्टीका अध्यक्ष डा. सीके राउतले दोस्रो पटक फेरी शिलान्यास गरेका छन् । सप्तरीको राजविराज १० स्थित बिरौलमा रामराजा प्रसाद सिंह स्वास्थ्य विज्ञान प्रतिष्ठानको शिलान्यास केपी ओली र राउत मिलेर बुधबार दोस्रो पटक गरेका हुन् । २०७८ असार २२ गते तत्कालीन प्रधानमन्त्री केपी शर्मा ओलीले भर्चुअल माध्यमबाट शिलान्यास गरेका थिए । प्रतिष्ठानको भौतिक संरचना निर्माण कार्य अगाडि बढ्न नसकिरहेको बेला सप्तरी २ का प्रतिनिधिसभा सदस्य डा. राउतले काम अगाडि बढाउनुको साटो दोश्रो पटक शिलान्यास गरेका छन् । प्रधानमन्त्री ओलीद्वारा शिलान्यास गरिएको योजनालाई पुनः डा. राउततले सिलान्यास गर्न लागेको भनी सार्वजनिक भएपछि सामाजिक सञ्जालमा व्यापक आलोचना शुरु भएको थियो । जनता समाजवादी पार्टी नेपालका अध्यक्ष समेत रहेका सप्तरी २ का तत्कालीन प्रतिनिधि सभा सदस्य उपेन्द्र यादव ओली नेतृत्वको सरकारमा उपप्रधान स्वास्थ्य एवम् जनसङ्ख्यामन्त्री हुँदा रामराजा प्रसाद सिंह स्वास्थ्य विज्ञान प्रतिष्ठान पूर्वाधार तयारी विकास समितिको कार्यालय स्थापना गराएका थिए । राजविराजमा प्रतिष्ठानको कार्यालय उद्घाटन, निर्देशक नियुक्ति तथा स्वास्थ्य मन्त्रालयबाट गाडी समेत दिएर पठाएका थिए । प्रतिष्ठानको डिपीआर तथा घेराबेरा समेत गरिएको थियो । यतिमात्र होइन, प्रतिष्ठानका भौतिक संरचनाका लागि बजेट समेत व्यवस्थापन गरिएको थियो । प्रतिष्ठानको परिकल्पनालाई मूर्त रुप दिन ५० बेडको अनुमति पाएको गजेन्द्रनारायण सिंह अस्पताललाई देशकै अत्याधुनिक सुविधासम्पन्न अस्पताल बनाउन ४२० बेडको भौतिक संरचना निर्माण गरिएको छ । अस्पतलामा नयाँ दरबन्दी स्वीकृत गराई सर्वसाधारणलाई गुणस्तरीय सेवा प्रदान गर्नुपर्नेमा अत्याधुनिक भौतिक पूर्वाधार हुँदाहुँदै सर्वसाधारण धरान, बिराटनगर लगायतका सहरहरु धाउन बाध्य छन् ।तात्कालिन समयमा प्रधानमन्त्री ओलीको सरकारमा गठन आदेशबाट प्रतिष्ठानको गठन भए पनि पुष्पकमल दाहाल प्रचण्ड नेतृत्वको सरकारमा म्याद नथपिएपछि त्यसको औचित्य समाप्त भइसकेको भनी जनमत पार्टीका अध्यक्ष डा. राउतले प्रतिक्रिया दिएका छन् । म्याद थप नभएपछि निर्माण कार्य स्थगित भएको अवस्थामा आफुले पहल गरेर पुनः नयाँ तवरबाट काम अगाडि बढाउन शिलान्यास गरिएको उनले बताएका छन् । डा. राउतले त्यस्तो प्रतिक्रिया दिए पनि त्यहीँ जग्गा, त्यही, डिपीआर नक्सा पनि पहिलाकै रहेको छ ।
